Cabalo baio, xinete pálido reúne tres novelas breves de argumento independente, mais percorridas por temas comúns: o peso do pasado, a ausencia de futuro e as súas traxedias.
Na primeira novela, A vella mortalidade, vemos como a historia familiar de Miranda, a protagonista, actúa como lenda e lastre a un tempo, e como a moza vai descubrindo eses efectos conforme madura.
Na segunda, O viño do mediodía, o pasado dun dos protagonistas, un misterioso xornaleiro sueco, retorna de xeito inesperado con tráxicas consecuencias
Na terceira, que dá título ao libro, volvemos atopar a Miranda, agora convertida en reporteira nun xornal durante os últimos meses da Primeira Guerra Mundial e os primeiros da pandemia de influenza de 1918. Neses días axitados e incertos, Miranda, namorada dun soldado que está a piques de marchar para a guerra en Europa, debe enfrontarse á enfermidade e á improbabilidade do seu propio futuro.
